I senzalavuru nun sunnu cchiù cum'a 'na vota, cumu quannu si spachiàva dopo a guerra. A chilli tiempi si peniava, pecchì, daveru, ara fine di la jurnata, la gente se putia bbuffare sulu e murmurìi. Oji, no; la pena di chin'è senza fatica è cchiù VILIENZA, c'avutru. Piglia cchiù la merulla ca la sacchetta. Ti scasta l'anima jire èrramo ppe la santa jurnata a circare a chistu e a chillu na fatica. Chi quannu, pua, ppe dire, l'ha truvata, o jietti sangue senza struttu o fatichi a nente, e chillu ca fai va 'nfaccia allu vientu. Chissi su tiempi ca di fatica ci nn'è sempre e menu e no pecchì se spachìa (guardati 'ntùarnu, ma l'ha visti quanti telefonini, benedica quanti machinuni ca giranu 'ntra Cusenza?); no, mo' ccussì va lu fattu: chine cchiù tena, cchiù ne vo e cchiù ne fa. Chista è la legge: lettu e appruvatu, chin'è cuntrariu è scumunicatu!

I dissoccupati su stati misi 'mmienzu da sa cazza e cosa ca dicianu PROGRESSO, ca pulitu e sorridente va avanti a bott'e machine, ca sì dannu lavuru, ma ad atre machine. E ccussì la dissoccupazione va cumu la morte ari piccirilli. Essere senza lavuru intra ssa ricca società è vita; vita guala a miliuni i giuvani e cristiani fatti, e nun c'è Italia, Francia e Mmerica chi tena. E' la vita! Nunn'è mancanza, ne curpa!

BASTA scirchiare a capu e stare sutta alla vrigogna di cude senza sale allu collocamento. BASTA a fare lu callu alli jirita ppe domande a posti fissi o a fa' la gobba chiedinnu a chistu e a chillu ppe l'anima di muarti.

U'Senzalavuru nunn'è sul'illu ed èrramu: AZA DRITTU 'SSE SPALLE, l'ure se le giramu ara mancina cumu già sta faciennu su munnu munnu chin'è senzalavuru, 'taliano o europeo chi sia. Nun t'abbattere cchiù ca nu disoccupatu nunn'è vacabunnu, nun c'è curpa, nun te murtificari e nun te chiangiari ca:

Adunca, primu: VULIMU!

Vulimu d'u Cumune 'na misata, picca ma di dignità, ppe tutti i cusentini chi da cchiù anni su senzafatica: nu reddito di cittadinanza o cumu diavulu lu vuliti chiamari. Aviti capitu? 'Na misata, no na rendita vitalizia!

Giustu a permettere alli cristiani a nno'jire limosinannua chistu e a chillu piacire ca 'nvece avutru sunnu. E principalmente ppecchì ha d'essere chiaru ca a mancanza e lavuru nunn'è storia ca 'nteressa sulu a pochi, ma PROBLEMA COMUNE.

E' giustu ppe principiare dicimu, vulimu e facimu ca chin'è Senzalavuru da n'annu e cchiù, nun li facimu pagari: trasporti, tiatru, scola, mostre, sport, musica e musicanti.

Pua, ancora, dicimu, vulimu e determinamu quantu segue: fattiva ed immediata sia data opera all' "Agenzia Comunale per il Lavoro e la Ricostruzione". Nun vulimu dàre principio a nu cirillu ca fa e sfa e chine dune e a chine pruminta: a ddi prestà sulu sordi e senza strozzo a quanti, ppe putì campari e senza vulire 'ngrassari lu culu, se vùannu minta, ppe ne dire una cardarella a spalla, picuni e manipula a rifari cumi nuavi i palazzi e Cusenza Vecchia. Oppure dare sordi a chine vò dari scienza e siensu a chine campa tutti i jiuarni dintra l'avutri quartieri, magari chilli cchiù 'nsivati e abbannunati.

CIROMA-FILO ROSSO

per la costituzione di un

Info : tel. 0984/28250 (ore 9,30-11,30)